Asiya İnkişaf Bankı (ADB) Qafqaz və Mərkəzi Asiya regionu üçün inflyasiya proqnozunu 2023 və 2024-cü illər üçün 0,3 faiz bəndi artırıb.
QafqazTürk.com xəbər verir ki, bu barədə ADB-nin Asiya ölkələrinin iqtisadi artım proqnozu ilə bağlı “İnflyasiya ilə güclü inkişaf” adlı hesabatında bildirilib.
Belə ki, inflyasiya proqnozu 2023-cü il üçün aprel ayında dərc edilən proqnoza qarşı 10,3 %-dən 10,6 %-ə, 2024-cü il üçün 7,5 %-dən 7,8 %-ə yüksəlib.
Qeyd edilib ki, bunun səbəbi əsasən Qazaxıstanda və Azərbaycanda yüksək inflyasiyanın müşahidə edilməsidir. Belə ki, Qazaxıstanda inflyasiya proqnozu 2023-cü il üçün aprel ayında dərc edilən proqnoza qarşı 11,8 %-dən 12,4 %-ə, 2024-cü il üçün 6,4 %-dən 7,2 %-ə artırılıb.
“Azərbaycanda pul-kredit siyasətinin sərtləşdirilməsinə baxmayaraq, bu ilin ilk 5 ayında inflyasiya 11,5 % səviyyəsində olub. Qazaxıstanda xarici inflyasiya təzyiqləri azalıb. Lakin 2023 və 2024-cü illərdə fiskal siyasətin gücləndirilməsi inflyasiyanın azaldılması səylərinə mane olacaq”, – ADB bildirir.
Həmçinin hesabatda deyilir ki, Gürcüstanda inflyasiya əhəmiyyətli dərəcədə azalıb. Ötən ilin ilk 5 ayında qeyd edilən 13,1 %-dən 1 il sonra 5,4 %-ə, Ermənistanda isə 7,7 %-dən 5,2 %-ə endirilib. Türkmənistanda da azalma tempi qeydə alınıb.
