İqtisadiyyat Nazirliyi Azərbaycanı birləşdirən Rustavi – Qırmızı Körpü avtomobil yolunun tikintisi üçün Marneuli bələdiyyəsində olan 101 956 kvadratmetr torpaq sahəsinin dövlət balansına keçirməyə dair qərar qəbul edib.
Qafqaztürk Media xəbər verir ki, artıq İqtisadiyyat Nazirliyi sözügedən yol hissəsinin tikintisi ilə bağlı sərəncam verib.
Yağılca qış otlaq sahəsində yerləşən 1 milyon 542 min 90 kvadratmetr ərazinin 98 min 252 kvadratmetri, Marneuli bələdiyyəsinin Keşəli kəndində 12500 kvadratmetr kənd təsərrüfatına yararlı torpaq sahəsinin 3120 kvadratmetri və Marneuli bələdiyyəsinin Ambarovka kəndində olan 6600 kvadratmetr torpaq sahəsinin 584 kvadratmetr torpaq sahəsi nazirin sərəncamı əsasında dövlət balansına keçiriləcək.
Xatırladaq ki, Avtomobil Yolları Departamenti Şərq-Qərb yolunun beynəlxalq əhəmiyyətli 4-cü investisiya layihəsinin Rustavi-Qırmızı körpüsü və Rustavi-Sadaxlı avtomobil yollarının (Lot 1-2) tikintisi layihələrini həyata keçirir.
Sözügedən layihə Şərq-Qərb avtomobil yolunun şərq hissəsinin sonuna aiddir. Magistral Türkiyə sərhədindən başlayır, Batumi, Kutaisi və Rustavidən keçərək Azərbaycan və Ermənistan sərhədlərinə qədər uzanır.
Layihə iki səviyyəli keçidlərlə dördzolaqlı avtomobil yolunun tikintisini nəzərdə tutur. Layihə TEM standartlarına uyğun hazırlanmışdır. Rustavidən Alget kəndi keçidinə qədər olan hissənin uzunluğu (Lot 1) 21 km, Alget qovşağından Azərbaycan sərhədi yaxınlığındakı Qırmızı körpüyə qədər olan hissənin uzunluğu isə 10,9 km-dir (Lot 2).
Lot 1-də dörd iki səviyyəli keçid var. Magistral yol dörd yerli əhəmiyyətli yol ilə kəsişir, bunun üçün düzbucaqlı kəsikli yolların təşkili planlaşdırılır. Dörd yol qovşağında təşkil olunacaq avtomobil yolunun hissəsi üçün 11 körpü (onlardan 7-si körpü keçidi) nəzərdə tutulub. Lot 2 Alget qovşağından başlayır.
Bu hissədə körpü keçidlərinin təşkil ediləcəyi iki qovşaq var; Burada bir qoşa körpü də tikiləcək. Bundan əlavə, həmin hissədə iki böyük yeraltı çıxış təşkil olunacaq”, – deyə iqtisadiyyat nazirinin əmrində bildirilir.
Məlumat üçün bildirək ki, layihə Gürcüstan və Avropa İnvestisiya Bankı arasında 19 fevral 2019-cu il tarixli imzalanmış kredit sazişi çərçivəsində Avropa İnvestisiya Bankı tərəfindən ümumilikdə 250 milyon avro məbləğində maliyyələşdirilir.
