სამუშაო შეხვედრა რწმუნებულის ადმინისტრაციაში გაიმართა და მისი მიზანი ეთნიკური უმცირესობებით მჭიდროდ დასახლებულ მუნიციპალიტეტებში არსებული მდგომარეობის, ინტეგრაციის პროცესის, ამ სფეროში არსებული გამოწვევებისა და მათი გადაჭრის გზების განხილვა იყო.
ქვემო ქართლში სახელმწიფო რწმუნებულმა, გიორგი დოხტურიშვილმა და საბჭოს წევრებმა, შეხვედრაზე ხაზი გაუსვეს, რომ ეთნიკური უმცირესობების ინტეგრაციისთვის რეგიონის მასშტაბით იმართება სხვადასხვა კულტურულ-შემეცნებითი ღონისძიება, ტარდება საგანმანათლებლო კონკურსები, რომლებშიც მონაწილეობას იღებენ სხვადასხვა ეროვნების ახალგაზრდები, ეთნიკური უმცირესობებით მჭიდროდ დასახლებულ მუნიციპალიტეტებში შენდება და რეაბილიტაცია უტარდება სკოლამდელ და ზოგადსაგანმანათლებლო დაწესებულებებს, რიგ სკოლებში მიმდინარეობს ბილინგვური სწავლება. გარდა ამისა, ეთნიკური უმცირესობის წარმომადგენლებისათვის მათთვის გასაგებ ენაზე მაუწყებლობს ტელევიზია და არსებობს ელექტრონული და ბეჭდვითი მედია საშუალებები. განსაკუთრებული ყურადღება ექცევა სახელმწიფო ენის სწავლებას, ქალთა მიმართ ძალადობისა და ნაადრევი ქორწინების წინააღმდეგ მიმართულ პრევენციულ ღონისძიებებს.
სამუშაო შეხვედრას ქვემო ქართლში სახელმწიფო რწმუნებულთან, გიორგი დოხტურიშვილთან ერთად მისი მოადგილეები: კახა კობერიძე, ნიკა კობახიძე, ილია ჯალაღანია, საზოგადოებრივი საკონსულტაციო საბჭოს წევრები, საქართველოს სახალხო დამცველის აპარატის რეგიონული სამმართველოს მთავარი სპეციალისტი, სახალხო დამცველის წარმომადგენელი ქვემო ქართლის რეგიონში, ირმა მჭედლიძე, სახალხო დამცველის აპარატის ანალიტიკური დეპარტამენტის მთავარი სპეციალისტები: მარიამ ორჟონია და გიორგი მელიქიძე ესწრებოდნენ.
