ისრაელის შეიარაღებული ძალები ჩრდილოეთ ღაზაში, შეცდომით მოკლულ ისრაელელ ბიჭებზე დამატებით ინფორმაციას ავრცელებს.
ოფიციალური ცნობებით, ერთ-ერთმა ჯარისკაცმა ცეცხლი შემდეგ გარემოებაში გახსნა: “ჰამასის” მიერ ტყვედ აყვანილი ბიჭები შენობიდან გამოდიოდნენ, ისინი ტანს ზემოთ შიშვლები იყვნენ და ეჭირათ ჯოხი, რომელზეც თეთრი ქსოვილი იყო დამაგრებული.
ისრაელის შეიარაღებული ძალების წარმომადგენლის თქმით, მას შემდეგ, რაც ერთ-ერთმა ისრაელელმა ჯარისკაცმა ეს სურათი იხილა, “საშიშროება იგრძნო და ცეცხლი გახსნა”.
ისრაელის ცნობით, ორი ბიჭი ადგილზე დაიღუპა, ერთი კი უკან გაიქცა და შენობაში შევარდა, თუმცა, მოგვიანებით, ისიც გარდაიცვალა.
“[ისრაელელმა] ჯარისკაცებმა გაიგონეს, როგორ ითხოვდა ვიღაც დახმარებას ებრაულად და მეთაურმა მაშინვე გასცა ცეცხლის შეწყვეტის ბრძანება”, – აცხადებენ ისრაელის შეიარაღებულ ძალებში და ირწმუნებიან, რომ სამხედრო პირს ბიჭები ტერორისტები ეგონა.
ისრაელის თავდაცვის ძალების ცნობით, ღაზაში, ოპერაციის დროს, ისრაელის არმიამ, შეცდომით, ისრაელელ მძევლებს გაუხსნა ცეცხლი. შედეგად, დაღუპულია სამი მძევალი – 22, 26 და 28 წლის ბიჭები. შემთხვევას თელ-ავივში საპროტესტო მსვლელობა მოჰყვა.
