დიმიტრი პესკოვი აცხადებს, რომ უკრაინაში „სპეციალური სამხედრო ოპერაცია“ დასრულდება მაშინ, როდესაც რუსეთის მიზნები მიღწეული იქნება

კრემლის პრესმდივანი დიმიტრი პესკოვი აცხადებს, რომ „სპეციალური სამხედრო ოპერაცია“ დასრულდება, როგორც კი რუსეთის მიზნები მიღწეული იქნება. ასე გამოეხმაურა პესკოვი ვოლოდიმირ ზელენსკის განცხადებას, რომ „მშვიდობა იმაზე ახლოსაა, ვიდრე გვგონია“.

„თქვენ იცით, რომ ნებისმიერი ომი ასე თუ ისე მშვიდობით სრულდება. თუმცა, ჩვენთვის აბსოლუტურად უალტერნატივოა ჩვენი დასახული მიზნების მიღწევა. როგორც კი ეს მიზნები მიღწეული იქნება ამა თუ იმ გზით, სპეციალური სამხედრო ოპერაცია დასრულდება“, – განუცხადა პესკოვმა ჟურნალისტებს.

ნიუ-იორკში ვიზიტით მყოფმა უკრაინის პრეზიდენტმა ვოლოდიმირ ზელენსკიმ „ეიბისი ნიუსთან“ ინტერვიუში განაცხადა: „ვფიქრობ, ჩვენ იმაზე ახლოს ვართ მშვიდობასთან, ვიდრე გვგონია. ჩვენ უფრო ახლოს ვართ ომის დასრულებასთან“.