„უოლ სთრით ჯორნალის“ ინფორმაციით, ისრაელის არმია „ჰამასის“ გვირაბების დატბორვას გეგმავს.
როგორც გავლენიანი ამერიკული გამოცემა წერს, ისრაელმა დაამონტაჟა სატუმბი სისტემა, რათა დატბოროს გვირაბები, რომლებსაც ღაზის სექტორში „ჰამასის“ წევრები იყენებენ.
როგორც გამოცემა წერს, ისრაელი ამ გზით შეეცდება, გვირაბებიდან მებრძოლებს გამოსვლა აიძულოს. „უოლ სთრით ჯორნალის“ ცნობით, ისრაელის არმიამ, სულ მცირე, ხუთი სატუმბი დაამონტაჟა იძულებთ გადაადგილებული პირების ბანაკ აშ-შატის ჩრდილოეთით.
გამოცემის ინფორმაციით, ათასი კუბური მეტრი წყლის გვირაბებში გაშვების შემთხვევაში, მთელი ქსელის დატბორვა რამდენიმე კვირაში იქნება შესაძლებელი.
ამასთან, „როიტერის“ ცნობით, ისრაელის არმიამ „უოლ სთრით ჯორნალის“ სტატიაში მოყვანილი გეგმის დეტალებთან დაკავშირებით კომენტარის გაკეთებაზე უარი განაცხადა, თუმცა ისრაელელმა სამხედროებმა აღნიშნეს, რომ „ისრაელის არმია მუშაობს, რათა გაანადგუროს „ჰამასის“ ტერორისტული პოტენციალი და ამისთვის სხვადასხვა სამხედრო, ტექნოლოგიურ საშუალებებს იყენებს“.
